काठमाडौ, १० चैत। उपप्रधानमन्त्री तथा रक्षामन्त्री ईश्वर पोखरेलको संयोजकत्वमा बसेको कोरोनाभाइरस रोकथाम तथा नियन्त्रण उच्चस्तरीय समन्वय समितिले कोरोनाभाइरसको जोखिमलाई ध्यान दिँदै मङ्गलवार बिहानबाट लागु हुने गरी अत्यावश्यक सेवाबाहेक अरू कामका लागि घरबाहिर निस्कने नपाउने गरी ‘लकडाउन’ गर्ने निर्णय गरेको छ।

उक्त निर्णय मङ्गलवार बिहान ६ बजेबाट लागु भई चैत १८ गते बिहान ६ बजेसम्म कायम रहने स्वास्थ्यमन्त्री भानुभक्त ढकालले बीबीसीलाई बताउनुभयो ।

उहाँले भन्नुभयो, “कोभिड-१९ को रोकथाम गर्नका निम्ति मानिसहरू बीचको दूरी कायम गर्नका लागि अझ प्रभावकारी बनाउन हामीले अत्यावश्यक सेवा बाहेकका अन्य सम्पूर्ण सेवालाई यथास्थितिमा राख्ने र व्यक्तिहरू घरबाहिर ननिस्कने खालको एउटा वातावरण बनाउन अपील गर्ने निर्णय गरेका छौँ।”

समितिले उक्त अवधिमा औषधोपचार र खाद्यवस्तुको खरिदजस्ता अत्यावश्यक कामबाहेक अन्य कोही पनि घरबाट निस्कन नपाउने उल्लेख गरेको छ।

अनुमतिप्राप्त बाहेक सबै प्रकारका सार्वजनिक र निजी सवारीसाधनमा रोक लगाइएको छ। सुरक्षा निकायका विमान र तोकिएका उडानबाहेक अन्य सबै आन्तरिक र व्यवसायिक उडानहरू बन्द गर्ने निर्णय भएको छ।

स्वास्थ्य, भन्सार, सुरक्षा, खाद्यवस्तु, खानेपानी, दुध, विद्युत, दुरसञ्चार, सूचना तथा सञ्चार, क्वारेन्टीन, फोहोरमैला व्यवस्थापन लगायत अत्यावश्यकबाहेक अरू क्षेत्रका सम्पूर्ण सरकारी कर्मचारीलाई बिदा दिने निर्णय गरिएको पनि अधिकारीहरूले जनाएका छन्। अन्य कर्मचारीहरूलाई आवश्यक पर्दा उपस्थित हुने गरी कार्यलय प्रमुखले बिदा दिने भनिएको छ।

औषधि, खाद्यवस्तु, स्वास्थ्य उपकरण, पानी, दूध र इन्धन लगायत अत्यावश्यक क्षेत्रका बाहेक सबै निजी उद्योग पनि बन्द गरिने जनाइएको छ। कलकारखानामा काम गर्ने श्रमिकहरूलाई बिदा दिन भनिएको छ।

‘लकडाउन’को समयमा कालोबजारी गर्नेलाई कारबाही गरिने जनाइएको छ। सरकारले औषधि र औषधिजन्य सामाग्रीहरूको नियमित आपूर्तिको व्यवस्था गर्ने जनाएको छ।

आफ्नो आदेशको कार्यान्वयनका लागि सबै जिल्लाका प्रमुख जिल्ला अधिकारीलाई निर्देशन दिइएको छ।

र पछिल्लो आदेशको कार्यान्वयनमा बाधा पुर्‍याउनेलाई संक्रामक रोग ऐन २०२० अनुसार सजाय हुने सोमबारसाँझ सरकारले जारी गरेको सूचनामा उल्लेख छ।(बीबीसी)