लण्डन(संयुक्त अधिराज्य), ४ भाद्र (बीबीसी) । अफगानिस्तानमा सत्ता कब्जा गरेको तालिबानले अघिल्लो महिना अफगानिस्तानको अल्पसङ्ख्यक हजारा समुदायका पुरुषहरूको ‘आमहत्या’ गर्नुका साथै कतिपयलाई ‘क्रूरतापूर्वक यातना दिएको’ तथ्य सार्वजनिक भएको छ ।
एक अन्तर्राष्ट्रिय मानवअधिकार संस्था एम्नेष्टी इन्टरन्याशनलले जनाए अनुसार अफगानिस्तानको गजनी प्रान्तमा जुलाई महिनाको आरम्भमा धेरै मानिसहरूको ज्यान लिन गरी ती घटना भएका थिए ।
प्रत्यक्षदर्शीहरूले त्यसका हृदय विदारक घट्नाका विवरणहरू दिएका छन्।
आइतवार अफगान राजधानी काबुलमाथि कब्जा जमाएपछि तालिबानले आफूहरूको केही नरम छवि प्रस्तुत गर्ने प्रयास गरिरहेका छन्।
तर एम्नेष्टीका अनुसार उक्त हिंसात्मक घटनालाई अब सञ्चालन हुने तालिबान शासनको भयानक र डरलाग्दो पाटोको रुपमा लिइएको छ ।
हजारा समुदाय अफगानिस्तानको तेस्रो ठूलो जनजाति समूह हो।
तिनीहरू सामान्यतया शिया इस्लाम मान्ने गर्दछन् र सो समुदायले बहुसङख्यकले सुन्नी इस्लाम मान्ने अफगानिस्तान र पाकिस्तानमा लामो समयदेखि दमन र अत्याचारपूर्ण व्यवहार सहँदै आएका छन्।
विहिवार सार्वजनिक गरिएको एम्नेष्टीको प्रतिवेदनमा भनिएको देशको पूर्वी गजनी प्रान्तको मालिस्तान इलाकामा जुलाईको ४ र ६ तारिखका बीच नौ जना हजारा पुरुषहरूलाई मारिएको थियो।
उक्त मानवअधिकारवादी समूहले विभिन्न प्रत्यक्षदर्शीहरूसँगको कुराकानी र उक्त घटनापछि प्रमाणको रूपमा प्राप्त फोटोग्राफहरूको आधारमा उक्त प्रतिवेदन तयार पारेको बताएको छ।
लडाइँ
स्थानीय गाउँलेहरूले सरकारी सेना र तालिबान लडाकुहरूबीच लडाइँ चर्किएपछि आफूहरू पहाडतर्फ भागेर गएको बताएका थिए।
तर तीमध्ये केही खानेकुरा लिनको लागि मुन्डराख्त गाउँमा फर्किँदा तालिबानले तिनीहरूलाई पर्खेर बसेको र घरहरूमा लुटपाट गरेको बताएका छन्। मुन्डराख्त भएर आफ्नो गाउँ फर्कन लागेकाहरूलाई पनि आक्रमण गरिएको बताइएको छ।
विवरणहरूका अनुसार ६ जनालाई गोली हानी मारिएको थियो। ती मध्ये धेरैलाई टाउकोमा गोली हानिएको थियो। र अन्य तीन जनालाई यातना दिएर मारिएको थियो।
एक जना प्रत्यक्षदर्शीले तालिबान लडाकुहरूलाई तिमीहरूले किन यस्तो क्रूरता देखाएको भनेर प्रश्न गरेको बताएका छन्।
जबाफमा ‘द्वन्द्वको बेला जो पनि मर्न सक्छ। बन्दुक बोक्ने पनि नबोक्ने पनि। यो लडाइँ हो’, भनेर एक जना लडाकुले भनेको बताइएको छ।
सङ्केत
एम्नेष्टीका महासचिव एग्निस कालामार्डले भन्नुभएको छ, ‘जुन क्रूरताका साथ मानिसहरूको ज्यान लिने घटना भएको छ त्यसले तालिबानको विगतको व्यवहारको सम्झना गराएको छ र त्यो अब भविष्यमा तालिबानको शासनमा के हुनेवाला छ भन्ने कुराको पनि भयानक सङ्केत हो।’
एम्नेष्टीका अनुसार तालिबानको नियन्त्रणमा रहेका कतिपय क्षेत्रमा मोबाइल फोन सेवा काटिएको छ। त्यसका कारण पनि त्यहाँ भएको उक्त घटनाका बारे जानकारी हालसम्म बाहिर आउन सकेको थिएन।
एम्नेष्टीले यस्ता घटनाका बारे छानबिन गर्न र जोखिममा रहेकाहरूको रक्षा गर्न संयुक्त राष्ट्र सङ्घलाई आह्वान गरेको छ।
