जब्दिघाट(बर्दिया), ४ जेठ । पाँच बर्षपहिले भत्किएको जब्दिघाट पुल पुनर्निर्माण लगायतका १५ बूँदे माग राखेर भत्केको पुलमुनि आमरण अनशन बस्नुभएका नेपाली कांग्रेसका केन्द्रीय सदस्य एवम् बर्दियाका सांसद सञ्जय गौतमको स्वास्थ्य अवस्था नाजुक बन्दै गएको छ ।

आमरण अनशनको छैठौं दिन उहाँको अवस्था झन कमजोर भएको छ । हिजो पाँचौ दिनदेखि नै उहाँ राम्रोसंग उभिन र बस्न सकिरहनुभएको छैन् । उहाँ सुतेर अनशनलाई निरन्तरता दिइरहनुभएको छ । सांसद गौतमको स्वास्थ अवस्था नाजुक बन्दै गएपछि चिकित्सकहरूले निगरानी बढेको छ ।

जिल्ला अस्पताल, बर्दियाका मेडिकल सुपरिटेन्डेन्ट डा. सुभाष पाण्डेयले उच्च रक्तचाप र मधुमेहका बिरामी गौतमले पाँच दिनसम्म खाना नखाँदा स्वास्थ्य अवस्था कमजोर बन्दै गएको बताउनुभएको छ । उहाँको शरीरमा पानीको मात्रा कम हुँदै गएको छ ।

बबई नदीको जब्दीघाट आसपासमा नयाँ पुल निर्माण, गुलरिया र भारतको मुर्तिहा नाका सञ्चालन, नदी नियन्त्रणका लागि पर्याप्त बजेट, बबई सिँचाइमा बजेट कटौती नगर्न, भुरीगाउँ—तेलपानी सडक निर्माण लगायत १५ सूत्रीय माग राख्दै गौतम वैशाख ३० गते देखि आमरण अनशनमा बस्नुभएको हो ।

यता सरकारले भने पप्पु कन्स्ट्रक्सनले बनाएर उद्घाटन नहुँदै बीचभागमा भाँचिएको जब्दिघाट पुल पुनर्निर्माणको विषयमा निर्णय गरेपनि अन्य मागहरुका बारेमा उच्चारण सम्म गरेको छैन ।

जब्दिघाट पुल नयाँ ठेक्कामार्फत निर्माण अघि बढाइने

भौतिक पूर्वाधार तथा यातायात मन्त्रालयले बर्दियाको जब्दिघाट पुल नयाँ ठेक्कामार्फत निर्माण अघि बढाइने भएको छ । मन्त्रालयमा बुधबार आयोजित पत्रकार सम्मेलनमा भौतिक पूर्वाधारमन्त्री प्रकाश ज्वालाले अर्थ मन्त्रालयसँग बजेटका लागि छलफल भएको र अबको १० दिन भित्रमा ठेक्का प्रक्रियाका लागि सूचना प्रकाशित गर्ने जानकारी दिनुभयो ।

बर्दियाका स्थानीय जनप्रतिनिधि, सांसदलगायत सबैसँग सल्लाह गरेर सहमतिमा पुगेको उहाँको भनाइ छ । पुराना पुलको अदालतमा मुद्दा भएको र त्यसको आसपास नयाँ ठाउँमा पुलको ठेक्कामा जान लागिएको उहाँले बताउनुभयो । उहाँले भन्नभयो, “अर्थ मन्त्रीसँग मन्त्रिपरिषद् बैठकमा कुराकानी हुँदा अर्थले बजेट सुनिश्चित गर्नुप¥यो र प्राविधिकरुपमा गर्नुपर्ने काम विभागले गरिरहेको बताएको छु ।”

अनशन तोड्न आग्रह

मन्त्री ज्वालाले हाल अनशनमा बसिरहनुभएका सांसद सञ्जय गौतमलाई अनशन तोड्न अनुरोध गर्नुभएको छ । अरु मन्त्रालयसँग सम्बन्धित विषय सम्बन्धित मन्त्रालय बोल्ने भए पनि आफ्नो मन्त्रालयले माग सम्बोधन गरेको उहाँको भनाइ छ । जब्दिघाट पुल निर्माण गर्नुपर्नेलगायतका माग गर्दै बर्दियाका सांसद गौतम आमरण अनशन बस्नुभएको छ । पप्पु कन्स्ट्रक्सनले निर्माण गरेको सो पुल पाँच वर्ष पहिले भत्केको थियो भने गत वर्षको बाढीले सबै संरचना बगाएको थियो ।

विकासका काम छिटो सम्पन्न भएर नागरिकले छिटो सुविधा पाउन् भन्ने कुरामा आफूले ध्यान दिइरहेको मन्त्री ज्वालाले बताउनुभयो । ‘क्रोनिक’ ठेक्काका विषयमा सकेसम्म लचिलो भएर काम गराउन लागिएको उहाँले बताउनुभयो । ऊर्जा, जलस्रोत तथा सिँचाइ मन्त्रालय, वन मन्त्रालय वा अन्य कुन मन्त्रालय वा निकायका कारण निर्माणमा अवरोध पुगेको हो सो निकायसँग अनुरोध गरेर वा दबाब दिएर कसरी हुन्छ काम गराउन लागिएको उहाँले बताउनुभयो । उहाँले भन्नुभयो, “कुनै पनि अवस्थामा काम नहुने र जनतालाई दुःख दिने र काम गर्नसक्ने अवस्था नभएमा मात्रै ठेक्का तोड्न लागिएको छ ।”

घोराहीको बबईदेखि तुलसीपुरसम्मको एक्जिम बैंकको सफ्ट लोनमा अघि बढेको सडक योजनाको ठेक्का तोडिएको उहाँले जानकारी दिनुभयो । सन् २०१९ मा दुई वर्षमा सकाउने गरी ठेक्का भए पनि अवधि थप्दासमेत १० प्रतिशत बाहेक प्रगति नभएकाले त्यो ठेक्का तोडिएको उहाँले बताउनुभयो । उहाँले बताउनुभयो, “त्यसपछि पनि निर्माण कम्पनीलाई पत्राचार र सम्पर्क गर्दा पनि वेवास्ता गरेकाले ठेक्का तोडिएको थियो ।”

मन्त्रालयका सहसचिव अर्जुनजङ्ग थापाले गत आर्थिक वर्षमा कतिपय पुराना ठेक्का सम्पन्न भएका र नभएको योजनामा पुरानो ठेक्का तोडेर नयाँ प्रक्रियामार्फत निर्माण अघि बढाइरहेको बताउनुभयो । सधैँ निर्माण व्यवसायीको कारणले मात्रै नभएर कहिलेकहिले भौगोलिकलगायतका कारणले निर्माणमा समस्या आउने गरेको उहाँले बताउनुभयो ।

सडक विभागका महानिर्देशक सुशीलबाबु ढकालले यस अघि पनि जब्दिघाट पुलका विषयमा कुरा उठेको र कुन विकल्पमा जान सकिन्छ भनी छलफल भइरहेको बताउनुभयो । अहिले आफू विभागका पुल महाशाखाका प्रतिनिधिसहित निर्माणस्थल पुगेर स्थानीयवासीसँग छलफल गरेर आएको उहाँले जानकारी दिनुभयो । उहाँले भन्नुभयो, “स्थानीयवासीसँग अहिले पुल भएको ठाउँभन्दा केही यताउता बनाउने गरी कुरा भएको छ ।”