ब्राम्प्टन(क्यानडा), १९ साउन(एजेन्सी) । क्यानडामा भैरहेको ग्लोबल टी २० लिगमा नेपाली क्रिकेटरहरु सम्मिलित टिमहरुको खेल बर्षाले प्रभावित भएको छ । बर्षाले खेललाई निरन्तरता दिन नसकिने भएपछि खेल रद्द हुनुका साथै सहभागी टिमबीच अंक बाँडिएको छ ।
आज नेपाली टोलीका कप्तान रोहित कुमार पौडेल सम्मिलित टोरोन्टो नेसनल्सले मोन्ट्रियल टाइगर्ससँग प्रतिस्पर्धा गरिहेको थियो ।
बर्षाले टस ढिलो भएको खेल ६ ओभरमा छोड्याईएको थियो । टाइगर्सले टस हारेर पहिले ब्याटिङ गरेको थियो । टाइगर्सले २ ओभरमा २ विकेट गुमाएर २५ रन बनाएको अवस्थामा भारी वर्षाका कारण खेल रोकिएको थियो । खेल पुनः सुरु हुन नसके पछि दुवै टोलीले समान १ अंक बाडेका हुन् । नेपाली कप्तान रोहित भने यस खेलमा बेन्चमा रहेका थिए ।
आज बिहान भएको नेपाली अलराउन्डर दीपेन्द्र सिंह ऐरी तथा लेग स्पिनर सन्दीप लामिछाने सम्मिलित भेनकुवर नाईट्सले सर्रे ज्याकवार्ससँग अंक बाडेको छ । भान्कुवरले पहिले ब्याटिङ गर्ने क्रममा ५ ओभरमा १ विकेट गुमाएर २८ रन बनाउँदा वर्षाका कारण खेल रोकिएको थियो । खेल पुनः सुचारु हुन नसक्दा दुवै टोली समान १ अंक बाडे । भान्कुवरमा रहेका दीपेन्द्र र सन्दीपले भने यस खेलमा प्लेइङ ११ मा स्थान बनाएका थिए ।
भान्कुवर र टोरोन्टोबीचको अर्को खेल आइतवार बिहान एकआपसविरुद्ध रहेको छ ।
