कीर्तिपुर(काठमाडौं), १७ माघ । आजदेखि नेपाल, नेदरल्याण्ड्स र थाइल्याण्डबीच त्रिकोणात्मक महिला टी २० श्रृखला सुरु हुँदैछ ।

कीर्तिपुरस्थित त्रिभुवन विश्वविद्यालयको क्रिकेट मैदानमा हुने त्रिकोणात्मक सिरिजको पहिलो खेल नेपाल र नेदरल्याण्ड्सबीच हुने छ । नेपाल र नेदरल्याण्ड्सबीचको खेल दिउँसो १२ः१५ बजे सुरु हुनेछ ।

नेपाली महिला टिमले घरेलु भूमीमा दोस्रो पटक टी२० आई सिरिज खेल्न लागेको हो । यसअघि नेपालले सन् २०२२ को मेमा युगान्डासँग ५ खेलको टी २० आई सिरिज खेलेको थियो ।

महिला टी २० आई वरियतामा नेपाल २०औं तथा नेदरल्याण्ड्स १६औं स्थानमा छ । थाइल्याण्ड १३औं स्थानमा छ ।

यस श्रृखला अन्तरगत सहभागी टोलीले एकअर्कासँग समान ३ पटक खेल्ने छन् । लिग चरणको अंक तालिकाको शीर्ष स्थानमा रहने टोली विजेता बन्नेछ ।

सिरिजमा नेपाली टोलीको खेलतालिका

३० जनवरी (माघ १७ गते) – नेदरल्याण्ड्ससँग
१ फेब्रुअरी (माघ १९ गते) – थाइल्याण्डसँग
२ फेब्रुअरी (माघ २० गते) – नेदरल्याण्ड्ससँग
४ फेब्रुअरी (माघ २२ गते ) – थाइल्याण्डसँग
५ फेब्रुअरी (माघ २३ गते) – नेदरल्याण्ड्ससँग
७ फेब्रुअरी (माघ २५ गते)– थाइल्याण्डसँग

कप्तान इन्दु बर्माको नेतृत्वमा रहेको नेपाली महिला टोलीमा बिन्दु रावल, सम्झना खड्का, कविता कुवँर, ममता चौधरी, पुजा महतो, राजमती ऐरी, रुविना क्षेत्री, कविता जोशी, रोमा थापा, मनिषा उपाध्याय, अलिसा कुमारी यादव, रेवती धामी, इश्वरी बिष्ट र सिता राना मगर रहेका छन् ।

ट्रफी सार्वजनिक

आजदेखि सुरु हुने नेदरल्यान्डस र थाइल्यान्डबीचको त्रिकोणात्मक टी–२० शृङ्खलाकोे ट्रफी सार्वजनिक गरिएको छ ।

नेपाल क्रिकेट सङ्घ (क्यान) ले टी–२० शृङ्खलाको पूर्वसन्ध्यामा बुधबार काठमाडौँमा आयोजना गरेको पत्रकार सम्मेलनमा ट्रफी सार्वजनिक गरिएको हो । नेपाली राष्ट्रिय महिला क्रिकेट टोलीकी कप्तान इन्दु बर्मा, नेदरल्यान्डसकी कप्तान बाबेट डे लिडे र थाइल्यान्डकी कप्तान नारुमोल चाइवाईले संयुक्त रूपमा ट्रफी सार्वजनिक गरेका थिए ।

पत्रकार सम्मेलनमा कप्तान बर्माले यो शृङ्खला आफूहरूका लागि महत्वपूर्ण रहेको बताउँदै ट्रफी जित्ने विश्वास व्यक्त गर्नुभयो । उहाँले नेपालको टोली सन्तुलित रहेको बताउँदै आफूहरूले राम्रो प्रदर्शन गर्ने बताउनुभयो ।

यस्तै, नेदरल्यान्डसकी कप्तान बाबेट डे लिडे र थाइल्यान्डकी कप्तान नारुमोल चाइवाईले पनि शृङ्खलाको उपाधि आफ्नो टिमले हात पार्ने दाबी गर्नुभयो । शृङ्खलाका लागि क्यानले इन्दु बर्माको कप्तानीमा १५ सदस्यीय नेपाली टोलीको घोषणा गरिसकेको छ ।

आजदेखि सुरु हुने श्रृखला माघ २५ गतेसम्म सञ्चालन हुने छ।