काठमाडौँ, २८ साउन । नेपाली कांग्रेसका निवर्तमान सभापति एवम् पूर्वप्रधानमन्त्री शेरबहादुर देउवा झन्डै पाँच महिना लामो स्वास्थ्य उपचारपछि स्वदेश फर्किनुभएको छ । स्वदेश फर्किए सँगै उहाँले एक अपिल जारी गर्नुभएको छ ।

सो अपिलमार्फत कांग्रेसका पूर्वसभापति देउवाले आफू कुनै पद वा शक्तिको प्राप्तिका लागि नभई राष्ट्रिय एकता, लोकतन्त्रको सुदृढीकरण र युवा पुस्ताको भावनालाई सम्बोधन गर्न सक्रिय हुने प्रतिबद्धता व्यक्त गर्नुभएको छ । ‘म शक्ति प्राप्त गर्न होइन, राष्ट्रिय एकता सुदृढ गर्न फर्किएको हुँ,’ देउवाले अपिलमा उल्लेख गर्नुभएको छ ।

सभापति देउवाले वर्तमान सरकार जनअपेक्षा पूरा गर्न असफल भएको आरोप पनि लगाउनुभएको छ। सरकारले जनताको मतलाई कदर गर्न नसकेको र राजनीतिक आग्रह एवं पूर्वाग्रहमा मात्र केन्द्रित भएको उहाँको आशय छ । ‘ताजा जनमतबाट उदाएको सत्तारुढ दलले जनताको मतलाई कदर गर्न सकेन भने लोकतन्त्रमा जनता नै जनार्दन हुन् भन्ने विषय कसैले बदल्न सक्दैन’ देउवाले भन्नुभएको छ।

देउवाले युवा पुस्तामा देखिएको परिवर्तनको तीव्र चाहना र उनीहरूको मौन पीडालाई कांग्रेसले नजिकबाट बुझेको उल्लेख गर्नुभएको छ । बदलिँदो समयसँगै पार्टीलाई पनि रूपान्तरण गर्दै लैजाने र नयाँ पुस्ताको सिर्जनशील क्षमतालाई कदर गर्ने उहाँले बताउनुभएको छ । उहाँले विगतका त्याग र बलिदानलाई नजरअन्दाज नगर्न आग्रह गर्दै नयाँ र पुराना पुस्ताबिचको सहकार्यमा जोड दिनुभएको छ ।

२०३३ सालमा जननायक बीपी कोइराला राष्ट्रिय मेलमिलापको नीति लिएर स्वदेश फर्किएको ऐतिहासिक सन्दर्भ स्मरण गर्दै देउवाले अहिले पनि मुलुकलाई सर्वपक्षीय राष्ट्रिय एकताको आवश्यकता रहेको उल्लेख गर्नुभएको छ ।

पार्टीका कार्यकर्ताहरूमा केही निराशा देखिएको स्वीकार गर्दै देउवाले उनीहरूको मनोबल बढाउन आफू लागिपर्ने बताउनुभएको छ । कांग्रेसको ऐतिहासिक दायित्व अझै नसकिएको र पार्टीलाई थप सुदृढ बनाउन सबै एकजुट हुनुपर्नेमा उहाँले जोड दिनुभएको छ ।

संविधानको आवश्यक संशोधन राष्ट्रिय सहमतिका आधारमा मात्र हुनुपर्ने उहाँको मान्यता छ। लोकतन्त्र, संविधान र नागरिक अधिकारका पक्षमा कांग्रेसले कहिल्यै सम्झौता नगर्ने उहाँले दोहोर्‍याउनुभएको छ ।

आफूलाई कुनै व्यक्तिगत लाभको पद नचाहिएको स्पष्ट पार्दै देउवाले जीवनको बाँकी समय राष्ट्र, राष्ट्रियता र लोकतन्त्रको सेवामा समर्पित गर्ने बताउनुभएको छ । ‘नेता बनेर होइन, यस महान् राष्ट्रको आजीवन नागरिक बनेर फर्किएको’ भन्दै विनम्रता र प्रेमका साथ सेवामा तत्पर रहने प्रतिबद्धता उहाँको अपिलमा उल्लेख छ । उहाँको अपिल यस्तो छ,