काठमाडौं, २१ माघ । संयुक्त अरब इमिरेट्सको खेल भ्रमण अन्तरगतका  एकदिवसीय र टी २०  अन्तर्राष्ट्रियको श्रृखला जितेर ऐतिहासिक कीर्तिमान कायम गरेको  नेपाल राष्ट्रिय क्रिकेट टिम आज दिउसो २ स् ३० बजे नेपाल फर्किदै छ । विजेता नेपाली टीम फ्लाई दुबाईबाट नेपाल फर्कन लागेको हो ।

नेपालले आईतबार सम्पन्न टी २० सेरिजको तेश्रो खेलमा युएईलाई १४ रनले पराजित गरेर  टि २० सिरिज २ १ ले जितेको हो ।

टी २० सेरिज पहिले सम्पन्न एक दिवसीय अन्तर्राष्ट्रिय श्रृखला पनि नेपालले युएईलाई  २-१ ले पराजित गरेको थियो।

सन्दीप सीधै अष्ट्रेलिया

नेपालका चर्चित क्रिकेट स्टार सन्दीप लामिछाने भने विजेता टीमसंग काठमाडौं उत्रिने छैनन् । नेपाली टीमका व्यवस्थापक रमण शिवाकोटीले दिएको जानकारी अनुसार बंगलादेश प्रिमियर लिग बिचैमा छोडेर नेपाली राष्ट्रिय टिमको लागि खेल्न युएई पुगेका लामिछाने आज नै युएईबाट सिधै अस्ट्रेलिया उड्ने कार्यक्रम रहेको जानकारी दिएका छन् ।

उनी बिग ब्यास लिगको लागि ब्रिसबेन जानेछन्। बिग ब्यासमा सन्दीप आबद्ध मेलबर्न स्टार्सले फेब्रुअरी ८  शुक्रबार ब्रिसबेन हिटसंग खेल्दैछ। यस्तै फेब्रुअरी १० मा मेलबर्नले सिड्नी सिक्सर्ससंग खेल्ने छ।

बिग ब्यास लिगको अंक तालिकामा मेलबर्न स्टार्स चौथो स्थानमा रहेको छ जसले १२ खेलमा समान ६र६ जितरहार बेहोरेको छ र १२ अंक बटुलेको छ। अंकतालिकामा उत्कृस्ट ४ भित्र पर्न मेलबर्नको लागि अन्तिम २ खेलमा बिजयी हुन आवश्यक छ।

बंगलादेश प्रिमियरमा भने सन्दीप आबद्ध  सिल्हेट सिक्सर्स प्लेअफ चरण पुग्ने सम्भावना टुंगिएको छ। सिल्हेटले लिग चरणको सम्पूर्ण १२ खेल खेल्दा ५ खेलमा जित र ७ खेलमा हार बेहोर्दै १० अंकसहित अंकतालिकामा छैठौं स्थानमा रहेको छ।

बंगलादेश प्रिमियर लिगमा सन्दीपले ६ खेलमा ४ विकेट लिएका थिए भने  बिग ब्यासका ४ खेलमा ८ विकेट लिएका थिए।

बिग ब्यास लिग पछि सन्दीप फेब्रुअरी १४ देखि सुरु हुने पाकिस्तान सुपर लिग खेल्न जानेछन् । उनी मोहम्मद हफिज कप्तानीको लाहोर कलन्दर्सबाट खेल्दैछन्।

पाकिस्तान सुपर लिग पछि सन्दीप मार्च २३ देखि भारतमा सुरु हुने इन्डियन प्रिमियर लिगमा दिल्ली क्यापिटलको लागि खेल्न पुग्नेछन्।