अहमदावाद (गुजरात,भारत), १७ चैत्र (एजेन्सी) ।इण्डियन प्रिमियर लिग (आइपीएल) अन्तरगत शनिवार राति भएको खेलमा गुजरात टाइटन्सले ३६ रनले मुम्बई इण्डियन्सलाई हराएको छ ।
१ सय ९७ रनको लक्ष्य पछ्याएको मुम्बईले २० ओभरमा ६ विकेट गुमाएर १ सय ६० रन मात्र बनाउन सक्यो ।
मुम्बईका लागि सूर्यकुमार यादवले २८ बलमा ४ छक्का र १ चौकाका साथ सर्वाधिक ४८ रन जोडे ।
तेस्रो विकेटका लागि सूर्यकुमारले तिलक बर्मासँग ६१ रनको साझेदारी गरे । तिलक ३६ बलमा ३ चौका र १ छक्काको सहयोगमा ३९ रन बनाएर आउट भए ।
कप्तान हार्दिक पाण्ड्या १७ बलमा ११, रोहित शर्मा ४ बलमा ८ र रायन रिकल्टन ९ बलमा ६ रन जोड्दै आउट भए ।
नमन धीर ११ बलमा ३ चौकाको सहयोगमा १८ रनमा अविजित रहे । मिचेल सान्टनर ९ बलमा १ चौका र २ छक्काको सहयोगमा १८ रनमा नट आउट रहे ।
गुजरातका लागि मोहम्मद सिराज र प्रसिद्ध कृष्णाले समान २ तथा साइ किशोर र कागिसो रबडाले समान १ विकेट लिए ।
त्यसअघि घरेलु मैदान नरेन्द्र मोदी अन्तर्राष्ट्रिय क्रिकेट स्टेडियममा टस हारेर पहिले ब्याटिङ गरेको गुजरातले निर्धारित २० ओभरमा ८ विकेट गुमाएर १ सय ९६ रन बनायो ।
गुजरातका लागि साई सुदर्शनले लगातार दोस्रो खेलमा अर्धशतक बनाए । आज टोलीका लागि ४१ बलमा ४ चौका र २ छक्कामा सर्वाधिक ६३ रन जोडे।
साईले कप्तान शुभमन गिलसँग पहिलो विकेटका लागि ८।३ ओभरमा ७८ रनको साझेदारी गरे । गिल २७ बलमा ४ चौका र १ छक्कासहित ३८ रनमा आउट भए।
जोस बटलर २४ बलमा ५ चौका र १ छक्काका साथ मा ३९ रन बनाए । राहुल तिवाटिया बलको सामना नगर्दै रन आउट भए ।
साहरुख खान ९ रनमा आउट हुँदा शरफेन रादरफोर्ड ११ बलमा २ छक्काको सहयोगमा १८ रन जोडे । राशिद खान ४ बलमा ६ रनमा आउट भए । रबडा ७ रनमा अविजित रहे ।
मुम्बईका लागि कप्तान हार्दिक पाण्ड्याले २ तथा सत्यनारायण राजु, मुजिब उर रहमान, ट्रेन्ट बोल्ट र दिपक चहरले समान १ । १ विकेट लिए ।
गुजरातले दोस्रो खेलमा पहिलो जित निकालेको छ । गुजरात पञ्जाब किंग्ससँगको पहिलो खेल टोलीले गुमाएको थियो।
मुम्बईको यो लगातार दोस्रो हार हो । टोली पहिलो खेलमा चेन्नई सुपर किंग्ससँग पराजित भएको थियो ।
मुम्बईले गुजरातसँग नरेन्द्र मोदी क्रिकेट स्टेडियममा खेलेको सबै ४ खेलमा हार बेहोरेको छ ।
