काठमाडौँ, १९ वैशाख । रुकुमपश्चिम भलिबल क्लबले १०औँ पप्एम कप एनभीए लिगमा पुरुषतर्फको उपाधि जितेको छ ।
त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा शनिबार भएको फाइनलमा रुकुमपश्चिमले हेल्प नेपाल स्पोर्ट्स क्लबलाई ३–० को सोझो सेटमा हरायो ।
रुकुमपश्चिमले हेल्प नेपालमाथि २९–२७, २५–२१, ३२–३० को रामोञ्चक जित निकालेको हो ।
उपाधिसँगै रुकुमपश्चिमले १० लाख रुपियाँ पुरस्कार पायो । उपविजेता हेल्प नेपालले पाँच लाख रुपियाँ पुरस्कार प्राप्त गर्यो ।
नेपाल भलिबल सङ्घले आयोजना गरेको लिगमा पुरुषतर्फ आठ र महिलातर्फ ६ गरी कुल १४ टोलीको सहभागिता रहेको थियो ।
पुरुषतर्फ हेल्प नेपाल, त्रिभुवन आर्मी, नेपाल पुलिस, एपिएफ, खिल्जी युवा क्लब (लुम्बिनी), रुकुमपश्चिम, कोशी प्रदेश र बुढानीलकण्ठ क्लब सहभागी थिए ।
महिलातर्फ न्यु डायमन्ड, नेपाल पुलिस, एपिएफ, सुदूरपश्चिम, एभरेस्ट क्लब र त्रिभुवन आर्मी क्लबले भाग लिएका थिए ।
