काठमाडौँ, ३ साउन। नेपाली कांग्रेसको संस्थापन इतर समूहले साउन ६ गते बीपी स्मृति दिवस मनाउने भएको छ ।
स्मृति दिवस मनाउन नेता प्रकाशमान सिंहको संयोजकत्वमा छुट्टै समिति बनाइएको छ ।
समूहले आइतबार सम्पर्क कार्यालय चुनदेवीमा पत्रकार सम्मेलन गर्दै कार्यक्रम गर्न सिंहको संयोजकत्वमा समिति बनाइएको जानकारी दिएको हो ।
कांग्रेसका संस्थापक नेता एवं प्रथम जननिर्वाचित प्रधानमन्त्री जननायक बीपी कोइरालाको ४४औँ स्मृति दिवसका अवसरमा देउवा समूहले साउन ६ गते काठमाडौँको प्रज्ञा भवनमा विशेष विचार गोष्ठी आयोजना गर्ने निर्णय यसअघि नै गरिसकेको छ ।
कांग्रेसका पूर्वउपसभापति एवं पूर्वउपप्रधानमन्त्री प्रकाशमान सिंहको संयोजकत्वमा गठित आयोजक समितिले बीपी स्मृति दिवस भव्य रूपमा सम्पन्न गर्न आवश्यक तयारी सुरु गरिसकेको पत्रकार सम्मेलनमा प्रचार प्रसार समितिका संयोजक मीन विश्वकर्माले जानकारी दिनुभएको छ ।
नेपाली कांग्रेसको संस्थापन इतर समूहले साउन महिनाभित्रै कार्यकर्ता भेला गर्ने र सो मिति ६ गते प्रज्ञा भवनबाटै घोषणा गरिने पनि जानकारी दिएको छ ।
