काठमाडौं, ११ साउन । साताको पहिलो कारोबार दिन नेपालको शेयर बजार ओरालो लागेको छ ।
अघिल्लो कारोबार दिन अर्थात गत शुक्रबार बढेर बन्द भएको शेयर बजारं यस दिन भने घटेर बन्द भएको हो।
सोमबार धितोपत्र बजार परिसूचक ३३.२८ अंक घटेर २७०१.३२ विन्दुमा झरेको छ।
यस दिन धितोपत्र बजार परिसूचकसँगै कारोबार रकम पनि घटेको छ। गत शुक्रबार ६ अर्ब २६ करोड रुपैयाँबराबरको शेयर खरिदबिक्री भएको बजारमा यस दिन ३ सय ६० स्टकको १ करोड ३९ लाख २५ हजार कित्ता शेयर खरिदबिक्रीबाट ६ अर्ब ८ करोड ८ लाख ६३ हजार रुपैयाँको कारोबार भएको छ।
सोमबार पनि एभरेष्ट कलर लिमिटेडको शेयर सकारात्मक सर्किट लेभलमा कारोबार भएको छ। सो कम्पनीको शेयरमूल्य यस दिन ९७ रुपैयाँ ६० पैसा बढेर ७ सय ४८ रुपेयाँ ७० पैसामा अन्तिम कारोबार भएको छ। अन्य स्टकहरुको मूल्य वृद्धिदर भने यस दिन ५ प्रतिशतभन्दा कम रहेको छ। कारोबारमा आएको आत्मनिर्भर लघुवित्त वित्तीय संस्थाको शेयरमूल्य यस दिन सर्वाधिक १३.३८ प्रतिशत घटेको छ।
कारोबार रकमका आधारमा यस दिन रिलायन्स स्पिनिङ्ग मिल्स शीर्ष स्थानमा रहेको छ। सो कम्पनीको यस दिन ३३ करोड ८६ लाख रुपैयाँबराबरको शेयर कारोबार भएको छ। त्यस्तै, यस दिन ग्लोबल आइएमई बैंकको २८ करोड रुपैयाँभन्दा बढीको शेयर किनबेच भएको छ भने रिडी पावर कम्पनीको कारोबार रकम २२ करोड रुपैयाँ नाघेको छ।
१३ उपसमूहमध्ये यस दिन ११ उपसमूहको परिसूचक घटेको छ भने दुई उपसमूहको परिसूचक बढेको छ। यस दिन उत्पादन तथा प्रशोधन उपसमूहको परिसूचक सर्वाधिक २.३० प्रतिशत घटेको छ। त्यसतै, यस दिन होटल तथा पर्यटन र व्यापार उपसमूहको परिसुचक २ प्रतिशतभन्दा बढी घटेको छ भने विकास बैंक, जलविद्युत, जीवन बीमा, लघुवित्त, निर्जीवन बीमा र अन्य उपसमूहको परिसूचक १ प्रतिशतभन्दा बढी घटेको छ। यस दिन बैंकिङ्ग र म्युचुअल फण्ड उपसमूहको परिसूचक सामान्य अंक बढेको छ।
