काठमाडौं, २९ चैत्र । नेपाल उद्योग वाणिज्य महासंघको नयाँ नेतृत्व चयनका लागि आज काठमाडौँमा चुनाव हुँदै छ।
महासंघको निर्वाचन कार्यक्रमअनुसार नेपाल प्रज्ञा प्रतिष्ठानमा अहिले बिहान ८ बजे मतदान सुरु हुनेछ। अपराह्न ४ बजे सकिने मतदानको मतगणना आजै अपराह्न ५ बजे थालिने र नतिजा घोषणा गर्ने कार्यतालिका छ।
वरिष्ठ उपाध्यक्ष पदका लागि उमेशलाल श्रेष्ठ, अञ्जन श्रेष्ठ र रामचन्द्र संघाई प्यानलसहित चुनावी मैदानमा हुनुहुन्छ।
महासंघको विधानअनुसार महासंघको अध्यक्ष भने हालका वरिष्ठ उपाध्यक्ष चन्द्र ढकाल स्वतः पदोन्नति हुनुहुनेछ। महासंघको विधानमा वरिष्ठ उपाध्यक्ष चुनिएको व्यक्ति तीनवर्षे कार्यकालपछि स्वतः अध्यक्ष हुने व्यवस्था छ।
उद्योगी व्यवसायीहरूको छाता संस्था नेपाल उद्योग वाणिज्य महासंघको ५७औँ वार्षिक साधारणसभा हिजो होटल याक एन्ड यतीमा उद्घाटन गरिएको हो।
साधारणसभाले महासंघको ६४ सदस्यीय नयाँ कार्यसमिति चयन गर्ने छ।
नेपाल उद्योग वाणिज्य महासंघको चुनावमा १ सय १८ जनाले उम्मेदवारी दिएका छन्। कूल ६४ पदमा हुने निर्वाचनमा १ सय १८ जनाको उम्मेदवारी परेको छ। महासंघको कार्यसमितिमा वरिष्ठ उपाध्यक्ष, उपाध्यक्ष, केन्द्रीय सदस्यसहित संस्थापक र द्विराष्ट्रिय पदमा गरी कूल ६४ पद छन्।
निर्वाचनमा वरिष्ठ उपाध्यक्षको पदमा ३ जनाले उम्मेदवारी दिनुभएको छ । वरिष्ठ उपाध्यक्षमा अञ्जन श्रेष्ठ, रामचन्द्र संघाई र उमेशलाल श्रेष्ठले उम्मेदवारी दिनुभएको छ । यी तीन उम्मेदवारमध्यबाट १ जना वरिष्ठ उपाध्यक्ष चुनिनेछन्।
यसबाहेक जिल्लानगर, वस्तुगत र एसोसिएटमा गरी ३ उपाध्यक्ष चाहिनेमा ८ जनाको उम्मेदवारी परेको छ। जिल्ला नगरमा दिनेश श्रेष्ठ, अरुणराज सुमार्गि, सुरकृष्ण वैद्यको उम्मेद्वारी परेको छ भने एसोसिटमा भरत आचार्य, ज्योत्स्ना श्रेष्ठको । वस्तुगत उपाध्यक्षमा सुकुन्तलाल हिराचन, मनिसलाल प्रधान, हेमराज ढकालले उम्मेद्वारी दिनुभएको छ ।
एक सदस्यको कोटा रहेको कोशी प्रदेशबाट ३ जनाले उम्मेदवारी दर्ता गराएका छन ् भने मधेशबाट २, बागमतीबाट २, गण्डकीबाट २, कर्णालीबाट ३ र सुदूरपश्चिमबाट २ जना उम्मेदवार बनेका छन्। यस्तै, लुम्बिनी प्रदेशबाट भने १ जनाको मात्र उम्मेदवारी परेकोले निर्विरोध निर्वाचित भैसक्नुभएको छ। महासंघको चुनावमा प्रत्येक प्रदेशका तर्फबाट समान १ । १ जनाको कोटा हुन्छ।
