धनगढी(कैलाली), २७ चैत्र । सोमपाल कामीको नेतृत्वमा रहेको टिम चौराहा धनगढी काठमाडौं गोल्डेन्सलाई पराजित गर्दै दोस्रो संस्करणको धनगढी प्रिमियर लिग (डिपिएल) को फाइनल प्रवेश गरेको छ ।

मंगलवार सम्पन्न पहिलो क्वालिफायरमा धनगढीले काठमाडौं गोल्डेन्सलाई १ बल बाँकी छदाँ १ विकेटले पराजित गर्यो ।

डिपिएल(२ को फाइनल प्रवेश गर्ने पहिलो टीम चौराह धनगढी बनेको छ भने पराजित काठमाडौं गोल्डेन्सले फाइनल प्रवेशका लागि महेन्द्रनगर युनाइटेड र सिवार्इसी अत्तरियाको बिजेतासंग खेल्ने छ ।

पहिले ब्याटिंग गर्दै काठमाडौंले दिएको १२८ रनको सामन्य लक्ष्यको पिछा गर्न उत्रिएको टिम चौराहाले खराब सुरुवात गरेको थियो । प्रतियोगितामा सफल रहन नसकेका युएईका ब्याट्सम्यान अस्फाक अहमद मात्र १ रन बनाउंदै पभेलियन फर्किए । उनि सुबोथ भाटीको बलमा किशोर महतोको हातबाट समातिन पुगे ।

धनगढीले आफ्नो दोस्रो विकेटका रुपमा महत्वपूर्ण खेलाडी सुनिल धमालालाई पनि छिट्टै गुमाउन पुग्यो । धमला १३ रनको निजि स्कोरमा आउट भए ।

तेस्रो नम्बरमा ब्याटिंग गर्न आएका रोहन मुस्तफाले ३३ तथा म्यान अफ दि म्याच बनेका शंकर रानाले २८ रन जोड्न बाहेक चौराहाका अन्य ब्याट्सम्यान चल्न सकेनन् ।
मुस्तफाले २० बलमा २ चौका र १ छक्का सहित ३३ रन जोडे भने शंकर रानाले इनिंग सम्हाल्दै २८ रन जोडे ।

चौराहालाई खेलमा जित दर्ता गर्न अन्तिम ओभरमा १० रनको जरुरत थियो र क्रिजमा थिए शंकर राना र योगेन्द्र सिंह कार्की । काठमाडौंको लागि अन्तिम ओभर गर्ने जिम्मा युवा बलर राशिद खानले पाए ।

२० औं ओभरको पहिलो बलमा रशिद खान आफ्नो दिशाबाट चुक्न पुगे र वाइड बल्न गर्न पुगे तर त्यस कमजोरीको फाइदा उठाउंदै शंकर राना र योगेन्द्र सिंह कार्कीले २ रन जोड्दै पहिलो बलमा ३ रन थपे। अर्को बलमा शंकर रानाले १ रन निकाल्दै योगेन्द्रलाई स्ट्राइक दिए । अब चौराहालाई जितका लागि ५ बलमा ६ रनको आवश्यकता थियो ।ओभरको दोस्रो बलमा योगन्द्र सिंह कार्कीले रन जोड्न विफल रहे ।

चौराहालाई फाइनलमा स्थान बनाउन ४ बलमा ६ रनको जरुरत थियो । ओभरको तेस्रो बलमा रन जोड्ने चक्करमा शंकर राना रन आउट हुनपुगे । चौराहाले चौथो बलमा अर्को विकेट गुमायो । यसपटक योगेन्द्र कार्की ठुलो सट खेल्ने प्रयासमा आउट भए । अब चौराहालाई जित दर्ता गर्न २ बलमा ६ रनको जरुरत थियो । क्रिजमा रहेका अन्तिम जोडी ललित भण्डारी र संसाद शेखमाथि जित दिलाउने चुनौती रहेको थियो । ओभरको पाँचौं बलमा संसादले राशिद खानको बललाई छक्का प्राहार गर्दै धनगढीलाई फाइनलको टिकट दिलाए ।

काठमाडौं को बलिंगमा सन्नी पटेल, राशिद खान र साहब आलमले समान २(२ विकेट लिएपनि जित दिलाउन विफल रहे । शंकर राना खेलको म्यान अफ दि म्याच घोषित भए ।

यसअघि पहिलो इनिंगमा काठमाडौँ गोल्ड़ेंसले ९ विकेट गुमाउदै १२७ रन बनाएको थियो। टस जित्दै टिम चौराहाका कप्तान सोमपाल कामीले काठमाडौँ गोल्ड़ेंसलाई ब्याटिंग गर्न निमन्त्रणा गरेका थिए। काठमाडौँको सुरुवात राम्रो हुन सकेको थिएन । प्रारम्भिक ब्याट्सम्यान सुबोथ भाटी खाता नखोली ललित भण्डारीको सिकार हुदै प्याभीलियन फर्किएकाथिए । २७ रनको स्कोरमा काठमाडौँले भुपेन्द्र थापाको रुपमा आफ्नो दोश्रो विकेट गुमाएको थियो। धमलाको बलमा बोल्ड हुनु अघि भूपेन्द्रले १७ बलमा १० रन बनाएका थिए ।

त्यसपछि कप्तान ज्ञानेन्द्र मल्ल र अमित श्रेष्ठले पारीलाई अघि बढाएका थिए । ज्ञानेन्द्र मल्ल आज निकै नै राम्रो लयमा देखिएका थिए । हरेक ओभरको सुरुवातमै प्रहार गर्दा बलरमाथि दबाव बनाउन सकिन्छ भन्ने सिद्धान्तमा देखिएका मल्लले पहिलो या दोश्रो बलमै सफलतापूर्वक चौका, छक्का प्रहार गरेका थिए । उता अमित श्रेष्ठले साझेदारीमा राम्रो साथ दिइरहे ।

१२।१ ओभरमा जब रोहन मुस्तफाको बलमा ज्ञानेन्द्र मल्ल लेग बिफोर विकेट हुन पुगे, तब काठमाडौँले आफ्नो लय गुमाएको थिय । नरेश बुढाऐर, सन्नी पटेल, रशिद खान र किशोर महतोले खासै केही गर्न सकेनन्। फर्ममा रहेका अमित श्रेष्ठ ३६ रनको व्यक्तिगत स्कोरमा दुर्भाग्यवस रन आउट हुन पुगे । ज्ञानेन्द्र मल्लले भने आकर्षक पारी खेल्ने क्रममा ३ चौका र २ छक्काको मद्दतले २३ बलमा ३८ रन बनाएका थिए ।

टिम चौराहा धनगढीले निकै नै राम्रो बलिंग र फिल्डिंगको प्रदर्शन गरेको थियो । चौराहाका लागि सोमपाल कामी र ललित भण्डारीले २(२ विकेट लिए भने सुनिल धमला, संसद सेख र रोहन मुस्ताफाले १(१ विकेट हात पारेका थिए ।