काठमाडौं, ६ जेठ । मलेसिया जाने कामदारसँग अवैध रूपमा रकम उठाएको आरोपमा वान स्टेप सेन्टर (ओएससी) र भिएलएनका सञ्चालक राम श्रेष्ठलार्इ प्रहरीले पक्राउ गरेको छ।

उनलाई प्रहरीले गौरीधाराबाट पक्राउ गरेको हो।

श्रम, रोजगार तथा सामाजिक सुरक्षा मन्त्रालयले माइग्राम्स, ओएससी, भीएलएन, जीएसजीबाट लिने शुल्कलगायतका कार्य अवैधानिक भएको निर्णय गर्दै त्यसलाई रोक्न गृह मन्त्रालयलाई पत्राचार गर्नासाथ प्रहरीले उनको निगरानी गरेको थियो ।

श्रेष्ठलाई भोलि म्याद थप गरी कारवाही अघि बढाइने प्रहरीले जनाएको छ।

ओएससीले मलेसिया जाने कामदारको राहदानी संकलन गरी २ हजार ८सय रुपैयाँ शुल्क र भ्याट ३ सय ६४ गरी ३ हजार १ सय ६४ रुपैयाँ लिने गरेको छ।

राहदानी दूतावाससम्म पुर्‍याउने भन्दै भीएलएनले थप ३ हजार ६ सय १६ लिने गरेको छ। सरकारले मलेसियाले श्रमिकलाई आर्थिक भार पर्ने गरी विभिन्न बहानामा रकम असुल्ने राखेका कम्पनीले लिने शुल्क खारेज गरेको थियो।

कम्पनी खारेज गरेसँगै वैदेशिक रोजगार मेडिकल व्यवसायीले मलेसिया जाने कामदारको स्वास्थ्य परीक्षण रोकेका थिए। भिसा लगाउने प्रक्रियाका लागि मलेसियाले नेपाल सरकारसँग सहमति नलिई ५ कम्पनीमार्फत शुल्क उठाउँदै आएको छ ।

जसका कारण प्रति कामदार १८ हजार ८ सय रुपैयाँ आर्थिक भार पर्ने गरेको थियो ।