काठमाडौं, २५ पौष । प्रदर्शनको मिति निर्धारण भैसकेको ह्यापी डेज् बलिउडको पेलानमा पर्ने भयले पछाडि धकेलिन बाध्य भएको छ ।
माघ १२ अर्थात्, जनवरी २६ बाट प्रदर्शनमा आउन लागेको दयाहाङ राई र प्रियंका कार्की अभिनित फिल्म ‘ह्याप्पी डेज’को प्रदर्शन मिति रोकिएको छ ।
जनवरी २५ मा बलिउडका ‘प्याडम्यान’ र ‘पद्मावती’ प्रदर्शनमा आउने निश्चित भएको छ । दुवै फिल्मका बारेमा समालोचकहरुले राम्रो टिप्पणी गरिआएका छन् ।
प्याडम्यानका अक्षय कुमार र ‘पद्मावती’ की दीपिका पादुकोन दुवै नेपाली दर्शकले रुचाएका कलाकार पनि हुन् ।
लामो समयदेखि विवादमा फसेको ‘पद्मावती’ (पद्मावत) पनि अब जनवरी २५ बाट प्रदर्शनमा आउँदैछ । निर्देशक तथा निर्माता सञ्जयलिला भन्सालीले ‘पद्मावती’को नाम परिवर्तन गरेर ‘पद्मावत’ राखेपछि भारतीय सेन्सर बोर्डले यो फिल्मलाई प्रदर्शनको अनुमती दिएको थियो ।
यसपूर्व अक्षय कुमारको प्याडम्यानले मात्र प्रदर्शनका निम्ति सोे मिति सुनिश्चित गरेको थियो ।
बलिउडका दुई ठूला फिल्म एकसाथ मैदानमा उत्रिने भएपछि मल्टिप्लेक्समा नेपाली दर्शकको ‘फ्लो’ बलिउड फिल्मतर्फ बढी हुने कुरालाई ध्यानमा राख्दै ‘ह्याप्पी डेज’ निर्माण टीमले फिल्मको प्रदर्शन मिति पोस्टपोन्ड गरेको हो ।
