काठमाडौं, १९ भदौ । पर्यटन मन्त्री रविन्द्र अधिकारीले नेपाल भ्रमण बर्ष २०२० मा २५ लाख पर्यटक नेपाल आउने बताउनुभएको छ ।
नेपाल पर्वतारोहण संघद्धारा मंगलबार राजधानीमा आयोजना गरिएको बार्षिक समीक्षा कार्यक्रममा उहाँले सो कुरा बताउनुभएको हो ।
उहाँले नेपालमा हवाईमार्गबाट भन्दा स्थलमार्गबाट आउने पर्यटकको संख्या बढी भएको बताउदै उहाँले दुवै खालका मार्गबाट आउने पर्यटकको संख्या अहिले २१ लाख पुगेको बताउनुभयो । हवाईमागबाट ९ लाख पर्यटक आएका छन तर स्थलमार्गबाट आउनेको संख्य १२ लाख छ , भारतबाट आफ्नै सवारी साधनमा नेपाल घुम्न आउने र पर्यटकस्तरीय होटलमा बस्नेहरुको संख्या नै १० लाख जति छ । तर अहिलेसम्म यो गणनामा आएन । अब सबै पर्यटकको लेखा राख्ने पद्धति बनाइदैछ । उहाँले पर्यटनले नेपालको कुल गार्हस्थ उत्पादनमा पुर्याएको योगदान बढाउने पनि बताउनुभयो ।
उहाँले पर्यटनको मूल आधार आन्तरिक पर्यटन भएको र त्यसलाई प्रवर्धन गर्न पनि सरकार लागेको बताउनुभयो ।
कार्यक्रमलाई सम्बोधन गर्दै मन्त्री अधिकारीले पर्वतीय पर्यटनका पदयात्रा र पर्वतारोहण नेपालको अनुपम पर्यटकीय उत्पादन भएको उल्लेख गर्दै यसको विकासको लागि नेपाल पर्वतारोहण संघसंग मिलेर काम गर्न सरकार सदा तत्पर रहेको उल्लेख गर्नुभयो ।
उहाँले सबै पर्वतीय हिमश्रृखलाहरुको प्रवद्र्धन सरकार एक्लैले गर्न नसक्ने बताउदै संघलाई देशका हिमालहरुको प्रबद्र्धनको कार्ययोजना तयार पार्न सुझाव दिनुभयो ।
उहाँले पर्वतीय पर्यटनको विकासको लागि सरकारले प्राज्ञिक क्षेत्रलाई पनि बढाएको उल्लेख गर्दै पर्वतीय पर्यटनको बारेमा स्नातक र स्नातकोत्तर तहका कक्षा थालिएको र पर्यटन विश्वविद्यालयको अवधारणा पनि अगाडि बढेको उल्लेख गर्नुभयो ।
कार्यक्रममा उहाँले पर्यटन क्षेत्रलाई व्यवस्थित गर्न नयाँ ऐन ल्याउन लागिएको पनि उल्लेख गर्नुभयो । हालको ऐनको ८० प्रतिशत प्रावधानहरु फेर्नपर्ने भएको रहेछ उहाँले भन्नुभयो, त्यसैले नयाँ ऐन तर्जुमा गर्ने काम थालिएको छ ।
कार्यक्रममा संघका अध्यक्ष सन्तवीर लामाले विभिन्न आरोह अवरोहकाबीच ४५ बर्षको यात्रा पार गरिसकेको नेपाल पर्वतारोहण संघले नेपालमा पर्वतीय पर्यटन विकासको संस्थागत प्रयासमा ठूलो टेवा दिएको बताउनुभयो । उहाँले पर्वतीय पर्यटनका लागि आधारभूत र विशेष तालिम दिने, हिमाल आरोहणको मार्ग पहिल्याउने, हिमालको सरसफाई गरि हिमाली वातावरण प्रदूषणरहित बनाउने, पर्वतारोहण क्षेत्रमा स्थानीय विकासका काममा सहयोग गर्ने देखि लिएर पर्वतारोहणको क्रममा जीवन गुमाएका आरोहीका आश्रित बालबालिकाको अध्ययनमा सघाउने जस्ता कल्याणकारी कार्य पनि संघले गर्दै आएको बताउनुभयो ।
उहाँले संघले पर्वतीय पर्यटनलाई अभिबृद्धि गराउने पोखरामा अन्तराष्टिय पर्वतीय संग्राहलय निर्माण गरेको, ककनीमा पर्वतारोही स्मृति उद्यान विकास गरिएको र सो स्थानमा पर्वतारोहणका क्रममा दुर्घटनामा परी जीवन गुमाएका वा अशक्त भएका आरोहीका बालबालिकालाई अध्यापन गराउने विद्यालय खोल्ने कार्ययोजना तयार पारिएको पनि बताउनुभयो । उहाँले पर्वतारोहीहरुको उपचारको लागि विशेष अस्पताल खोल्ने योजना पनि अगाडि बढेको उल्लेख गर्नुभयो ।
उहाँले पर्वतारोहण संघलाई राजनीतिरहित, विपक्षरहित हिमाल जस्तो स्वच्छ बनाउन पनि आग्रह गर्नुभयो ।
कार्यक्रममा पूर्व पर्यटन सचिव सुरेशमान श्रेष्ठले अबको १५ महिना पछि आरम्भ हुने नेपाल भ्रमण बर्ष २०२० सफल बनाउन विशेष तयारी गर्नुपर्ने आवश्यकतामा जोड दिनुभयो ।
कार्यक्रममा संघका सचिव टिकाराम गुरुड.ले स्वागत मन्तब्य दिनुभएको थियो भने कार्यक्रम सञ्चालक महासचिव कुलबहादुर गुरुड.ले संघको बार्षिक कार्यक्रमको झलक प्रस्तुत गर्नुभएको थियो ।
